ഇരട്ടക്കുട്ടികളുടെ ടീച്ചർ - കുഴൂർ വിൽസൺ

ഒരേ കുട
ഒരേ ഉടുപ്പ്
ഒരേ ഹാജർ
ഒരേ അച്ഛൻ

സുമിക്ക് ഹിന്ദിയിൽ  41 1/2
സൗമ്യക്കു 41
ഇഗ്ലീഷിൽ 43
സൗമ്യക്ക് 44
കണക്കിൽ സമാസമം

ഇച്ചിമുള്ളാനും വടിയെടുക്കാനും
ആശുപത്രിയിലും ഒരുമിച്ച്

ലീവ് ലെറ്ററിൽ രണ്ടു പേർക്കും  പനി

സൗമ്യ ഉടുപ്പാലെ അപ്പിയിട്ടതിനു
ടീച്ചർ കളിയാക്കിയത് സുമിയെ
സുമി രാഖിയെ പിച്ചിയതിനു
തല്ലു കിട്ടിയതു സൗമ്യക്കു

സുമി പദ്യം തെറ്റിച്ചപ്പോൾ
സൗമ്യ കൈ നീട്ടി
സൗമ്യക്കു കിട്ടിയ ഇമ്പോസിഷൻ
എഴുതിയതു സുമി

നാലു കണ്ണുകളുടെ രശ്മികൾ
പലപ്പോഴും ടീച്ചറെ തെറ്റിച്ചു

സുമിയെവിടെയെന്നു സുമിയോട് ചോദിച്ചു

ഞാൻ സത്യമായിട്ടും
സൗമ്യയാണെന്നു
സൗമ്യ ആണയിട്ടു

ഒരു ദിവസം ടീച്ചർ
ഹാജർ വിളിക്കുകയായിരുന്നു

സുമി-സൗമ്യ

ഹാജർ എന്ന കുഞ്ഞുശബ്ദം
വിറയാർന്ന് ഒറ്റയ്ക്കു

കുരുന്നു ചെവികൾക്കും
കണ്ണുകൾക്കും മൂക്കുകൾക്കുമിടയിൽ
ടീച്ചർ കണ്ടു

നിറഞ്ഞ രണ്ടു കണ്ണുകൾ.