പുതിയ അധ്യയന വര്‍ഷത്തില്‍
മത്തായി മാഷ്‌ ഉണ്ടായിരുന്നില്ല
മുറി മീശയും സൂട്ടും കോട്ടുമിട്ട
പുതിയ മാഷാണ്‌
കണക്ക്‌ പഠിപ്പിക്കാന്‍ വന്നത്‌
ജര്‍മന്‍ ഭാഷയിലായിരുന്നു
മനസ്സിലാവുന്നില്ലെന്നു പറയാന്‍
ആര്‍ക്കും ധൈര്യമുണ്ടായില്ല
ഇറ്റലിക്കാരനായ ഒരു തടിയനാണ്‌
പുതിയ ഹെഡ്‌മാസ്റ്റര്‍
അയാള്‍ നിറച്ച റിവോള്‍വറുമായി
വരാന്തയില്‍ ഉലാത്തിക്കൊണ്ടിരുന്നു
സാമുഹ്യപാഠം പഠിപ്പിച്ചിരുന്ന
സൗമിനിട്ടീച്ചറെയും കണ്ടില്ല
തലയില്‍ തെടിക വെച്ച
ഒരു അറബിയായിരുന്നു പുതിയ മാഷ്‌
മേലാകെ ഭസ്‌മം പൂശിയ
ഭ്രാന്തനെപ്പോലിരുന്ന ഒരാളാണ്‌
ശാസ്‌ത്രം പഠിപ്പിക്കാന്‍ വന്നത്‌
ഡേവിഡ്‌ മാഷെ കാത്തിരുന്ന ഞങ്ങളെ
നിരാശപ്പെടുത്തിക്കൊണ്ട്‌
അയാള്‍ കവിടികള്‍ നിരത്തി
മലയാളം പഠിപ്പിക്കാന്‍
നീലകണ്‌ഠന്‍ മാഷ്‌ വന്നില്ല
ആ പിര്യേഡില്‍ ഞങ്ങളെ ഒരാള്‍
ഗ്രനേഡ്‌ ഉണ്ടാക്കാന്‍ പഠിപ്പിച്ചു
പി ടി മാഷ്‌ക്കു പകരം വന്നത്‌
ഒരു ജപ്പാന്‍കാരന്‍
അയാള്‍ ഞങ്ങളെ മുട്ടിലിഴയാനും
കണ്ണുകെട്ടി നടക്കാനും പരിശീലിപ്പിച്ചു
മേല്‍പ്പുരയില്‍ ഓടിന്റെ വിളുമ്പുകളില്‍
കൂടുകൂട്ടിയിരുന്ന പ്രാവുകളെല്ലാം പോയിരുന്നു
മുറ്റത്തെ പടര്‍ന്നു പന്തലിച്ച മാവ്‌ മുറിച്ചുമാറ്റി
നിലം മുഴുവന്‍ ടൈലിട്ടു
ഉറുമ്പുകളോട്‌ സംസാരിച്ചതിന്‌
അഞ്ചിലെ അപ്പുവിന്റെ തല മൊട്ടയടിച്ചു
സ്‌കൂളിനു പുറത്ത്‌ കപ്പലണ്ടി വിറ്റുനടന്നിരുന്ന
കൃഷ്‌ണേട്ടനെ അവിടെനിന്ന്‌
ഹെഡ്‌മാസ്റ്റര്‍ ഓടിച്ചു
അയാള്‍ അങ്ങാടിയില്‍ ചെന്നു പറഞ്ഞു
സ്‌കൂളിപ്പോള്‍ പഴയപോലെയല്ല
ഭയങ്കര അച്ചടക്കമാണ്‌.
No comments:
Post a Comment
ഈ ബ്ലോഗിനെക്കുറിച്ചുള്ള നിങ്ങളുടെ അഭിപ്രായങ്ങളും നിര്‍ദ്ദേശങ്ങളും ഇവിടെ രേഖപ്പെടുത്തുമല്ലോ....