ടീച്ചര്‍ ടീച്ചര്‍
ഞങ്ങളെയിനിമേൽ
ചീത്ത വിളിക്കാൻ നോക്കേണ്ട
മൂക്കില്‍ക്കണ്ണട
മീതെക്കൂടി
നോക്കിപ്പേടിപ്പിക്കേണ്ട
ടീച്ചര്‍ ക്ലാസില്‍-
പ്പറഞ്ഞ നുണകൾ
നാട്ടില്‍ മുഴുവന്‍ പാട്ടായി
നദിയില്‍ ജലമൊഴു-
കാറുണ്ടത്രേ
മലകളിലെങ്ങും കാടത്രേ!
ഇടവപ്പാതിയി-
ലെല്ലാടത്തും
ഇടതടവില്ലാമഴയത്രേ!
കൃഷിചെയ്തീടാ-
നത്രേ വയലുകൾ
കുടിവെച്ചീടാനല്ലത്രേ!
കേരളമെന്നാൽ
ദൈവംതന്നുടെ
കേളിപ്പെട്ടൊരു നാടത്രേ!
ഇതുപോൽ മുട്ടൻ
നുണകള്‍ പറഞ്ഞി-
ട്ടിനിയും വിഡ്ഢികളാക്കേണ്ട
ഇരുകണ്ണാലേ
ഞങ്ങള്‍ കാണും
പരിസരമാണേ പരമാര്‍ത്ഥം.
=====================
No comments:
Post a Comment
ഈ ബ്ലോഗിനെക്കുറിച്ചുള്ള നിങ്ങളുടെ അഭിപ്രായങ്ങളും നിര്‍ദ്ദേശങ്ങളും ഇവിടെ രേഖപ്പെടുത്തുമല്ലോ....