മരണം തട്ടിയെടുത്ത
പ്രിയപ്പെട്ടവരുടെ നമ്പറുകൾ
തെളിഞ്ഞുനിൽക്കുന്നുണ്ടാകും
ചിലപ്പോൾ ഫോണിൽ.
എത്ര മറന്നുകളഞ്ഞാലും
വീണ്ടും വീണ്ടും
മടങ്ങി വരുന്ന
ഓർമകൾ എന്നപോലെ.
ഡയൽ ചെയ്യാനാവാതെ
വിരലുകൾ വിറയ്ക്കുമ്പോൾ
അജ്ഞാതമാണെങ്കിലും
പരിചിതമായ
ഏതോ ടവറിന്റെ
പരിധിയിലിരുന്ന്
അവർ പറയുന്നത് കേൾക്കാനാവും.
ജീവിതം തോർന്നിട്ടും
കവിത പെയ്യുന്ന
മരങ്ങൾ എന്നപോലെ
നിലാവിൽ കുളിച്ചുനിൽക്കും.
അരങ്ങൊഴിഞ്ഞാലും
കെട്ടുപോകാത്ത വെളിച്ചമായി
ഹൃദയങ്ങളിലേക്ക്
പരന്നൊഴുകും.
ജീവിച്ചിരിക്കുന്നവരോ
മരിച്ചവരോയെന്ന്
തിരിച്ചറിയാതെ പോകും
ചില നിമിഷങ്ങൾ.
ആയതിനാൽ
മരിച്ചവരുടെ
ഫോൺ നമ്പറുകൾ
ഡിലീറ്റ് ചെയ്യാറില്ല ഞാൻ.
No comments:
Post a Comment
ഈ ബ്ലോഗിനെക്കുറിച്ചുള്ള നിങ്ങളുടെ അഭിപ്രായങ്ങളും നിര്‍ദ്ദേശങ്ങളും ഇവിടെ രേഖപ്പെടുത്തുമല്ലോ....