പ്രണയിക്കാത്തവർ

പ്രണയിക്കാത്തവരെ
എവിടെ വെച്ചും
എളുപ്പത്തിൽ തിരിച്ചറിയാം

നടക്കുമ്പോള്‍
അവരുടെ കാലടികൾ
മണ്ണില്‍
ആഴത്തില്‍ പതിയില്ല

വെയിൽ
അവരുടെ കണ്ണുകളെ
പൊള്ളിക്കുകയോ
മഴ
അവരുടെ ഹൃദയത്തിലേക്ക്
ചോർന്നൊലിക്കുകയോ ചെയ്യില്ല

ആകാശം
അവർക്ക്
പക്ഷികൾക്ക് പറക്കാനുള്ള
വഴികൾ മാത്രമാണ്

കടൽ
അവർക്ക്
കപ്പലോടിക്കാനും
മീൻ പിടിക്കാനുമുള്ള
വെറും ജലാശയം മാത്രവും

കാട്
മരങ്ങളുടെ കൂട്ടവും
ക്രൂരമൃഗങ്ങളുടെ കൂടും മാത്രമാണ്

നിലാവ്
ഇരുട്ടത്ത് നടക്കാനുള്ള വെളിച്ചവും

മഴ
വേനലിൽ
കിണർ വറ്റാതിരിക്കാനുള്ള
ജല സമൃദ്ധിയും മാത്രമാണ്

നിദ്ര
നേരം വെളുപ്പിക്കാൻ വേണ്ടി മാത്രമുള്ള വെറും നേരമ്പോക്കും

ഓർമ്മ
മറക്കാൻ വേണ്ടി മാത്രം
ഓർത്തുവെക്കുന്ന തോന്നലുകളും

മറവി
സ്മൃതിമാലിന്യങ്ങൾ
വലിച്ചെറിയാനുള്ള
ചവറ്റുകുട്ടയും മാത്രമാണ്

പ്രണയിക്കാത്തവർ
എത്ര ഭാഗ്യവാൻമാരാണ്

എപ്പോള്‍ വേണമെങ്കിലും
അവർക്ക് ചിരിക്കുകയോ
കരയുകയോ ചെയ്യാം

അവർ
കൊഴിഞ്ഞ പൂക്കളെ നോക്കി
സങ്കടപ്പെടില്ല

വാടിയ ഇലകളിൽ
ചവിട്ടി നടക്കുമ്പോള്‍
മരത്തെ ഓർക്കില്ല

ഒടിഞ്ഞ ചില്ലകൾ കാണുമ്പോള്‍
കരിഞ്ഞ തൂവലുകളിൽ തൊടില്ല

വറ്റിയ നദി മുറിച്ചുകടക്കുമ്പോൾ
അവരുടെ കാലടികൾ പൊള്ളില്ല

പ്രണയിക്കാത്തവരുടെ രക്തത്തിൽ
ഏകാന്തയുടെ വിഷം കലരില്ല

അവരുടെ വാക്കുകളെ
മൗനം മുറിവേൽപ്പിക്കില്ല

അവരെഴുതുന്ന കവിതകളിൽ
വെടിയേറ്റ പാടുകളുണ്ടാവില്ല

പ്രണയിക്കാത്തവരെ
എളുപ്പം കണ്ടുപിടിക്കാം

അവരുടെ കാലുകളിൽ നിന്ന്
ഒരിക്കലും
ചങ്ങലക്കിലുക്കം കേൾക്കില്ല.........