നീ ആരാണെന്ന് ചോദിച്ചാൽ - ഡോണ മയൂര

ചോദ്യം കേൾക്കുമ്പോൾ
ഞാനൊന്ന് ഞെട്ടും.
.
ഇത്തരം ഒരു കള്ളം
ഇതിനു മുൻപ് പറഞ്ഞ്
പരിശീലിച്ചിട്ടില്ലല്ലോ
എന്നോർത്ത് സ്വയം പഴിക്കും.
.
ഇതു വരെ പറഞ്ഞിട്ടുള്ള
കള്ളങ്ങൾ പോരാതെ വരും.
.
ഇതുവരെ വായിച്ചിട്ടുള്ളതും
അറിഞ്ഞിട്ടുള്ളതുമായ
കവിതയിലും കഥയിലും
സിനിമയിലും ജീവിതത്തിലുമെല്ലാം
തിരഞ്ഞു കണ്ടെത്താനായി
ഓർമ്മയ്ക്ക് ചെന്നെത്താൻ
പറ്റുന്നയത്രയും ഇടങ്ങളിലേക്ക്
വേഗം, അതിവേഗം പായും.
.
ഓരോ വാക്കും
തിരിച്ചും മറിച്ചുമിട്ട്
ഓർമ്മയെ കൊണ്ട് തിരയിക്കും,
എല്ലായിടങ്ങളിലും തിരയിക്കും.
.
തിരഞ്ഞു തിരഞ്ഞൊടുവിൽ
കണ്ടു പിടിക്കും.
.
ഇത്തരമൊരു അവസരത്തിൽ
അതിലുള്ള കഥാപാത്രങ്ങൾ
എന്ത് കള്ളമാണ്
ഏതു വിധേനയാണ്
പറഞ്ഞിരിക്കുന്നതെന്ന്
കണ്ടു പിടിക്കും.
.
എന്നാൽ ഭാഗ്യവശാൽ
അവയൊന്നും പോരാതെ വരും.
.
അപ്പോൾ ഞാൻ ചിരിക്കും,
സങ്കടങ്ങളും സന്തോഷങ്ങളും
രഹസ്യമായി കടത്തിയ
ഇടങ്ങളിലൂടെ
ഓട്ടവീണ പാത്രത്തിൽ
രാത്രി കട്ടുകൊണ്ടു ഓടുന്ന
നക്ഷത്രമാണ് നീയെന്ന്
മറുപടി പറഞ്ഞ്
ഞാൻ നിർത്താതെ ചിരിക്കും!

തേരൊഴിഞ്ഞ അട്ട - ഡോണ മയൂര

ഒന്നോർക്കുന്ന മാത്രയിൽ നൊന്ത്

അട്ടയെ പോലെ
ചുരുണ്ടുപോകുന്ന ഓർമ്മയെ
ഒരു കുട്ടിയുടെ ജിജ്ഞാസയോടെ
കമ്പുകൊണ്ടുകുത്തിനോക്കി
തൊട്ട് നിൽക്കുന്നതെന്തിന്?

കമ്പിന്റെ തുമ്പിൽ കുത്തിയെടുത്ത്
കമ്പിൽ നിന്നും കൈയ്യിലേക്കുള്ള
ദൂരത്തിന്റെ സുരക്ഷിതത്വത്തിൽ നിന്നും
ദൂരേക്കെറിഞ്ഞ് കളയുന്നതെന്തിന്?

ചി
ത
റി
പ്പോ
യ

പ്പോ
ഴെ
ല്ലാം

മുന്നിൽ ലോകം
അതിലും ചെറുതായി.

ചിതറിയതിൽ നിന്നും
ഒരു കണികയെ പോലും
തൊടാൻ കഴിയാതെ
ലോകം വീണ്ടും വീണ്ടും
ചെറുതായിക്കൊണ്ടിരിക്കുമ്പോൾ,
അട്ടക്കാലുകൾ പോലെ മുറികൂടി
പഴയ ഓർമ്മയിലേക്ക്
ഇഴഞ്ഞ് ചെല്ലുന്നു,
ചുരുണ്ടുപോകുന്നു.